أخبار وطنية طبيب تونسي مقيم في الطب النووي ينشر رسالة استغاثة ويقول "بلادي اليوم قتلتلي طموحي".. كل التفاصيل
نشر الشاب أيمن بالطيب وهو طبيب مقيم في الطب النووي بمستشفى سهلول بسوسة رسالة عبر فيها عن استيائه من منعه من اجراء تربص لمدة سنة بقسم الطب النووي بمستشفى بيشا بباريس بتعلة "تعليمات" في شكل قرار يمنع أي مقيم للتربص بالخارج الا اذا كان في السنة الاخيرة..
وهذا نص الرسالى التي عرض فيها الدكتور مشكلته:
في العادة مستانس نحكيلكم على مشاكل الناس، اما توا بش نحكيلكم على كيفاه بلادي اليوم قتلتلي طموحي : مهنتي طبيب مقيم في الطب النووي. ضيعت عامين كاملين من حياتي بش نجمت نخلط نعمل الاختصاص هذا.
اما اليوم بلادي وصلت ندمتني الي حبيت نعمل اختصاصي في تونس و موش نهرب البرة ملي خذيت ديبلومي ... كيف بلادك تعاقبك و تحرمك من تربص (stage dfms) تحصلت عليه وحدك، من غير كتافات، بعد تعب، و تقلك "لا ما عندك وين ماشي" ...
كيفاش تحبك ما تسبش النهار الي قعدت فيه هوني؟! و كيفاه تحبك ما تسيبش الي وراك و قدامك و تهرب البرة للابد؟ خاصة في اختصاصي (médecine nucléaire) الي بدا يتطور في تونس، اما مازال ناقص برشا خاطر ما عندناش الالات المتطورة الي موجودة في الخارج ( و الي بش تولي موجودة قريبا في سبيطارتنا و بش تتكلف اكثر من 15 مليار على الدولة).
و الالات هذه (PETScan، للتصوير المقطعي بالإصدار البوزيتروني) لازمها ناس متدربة عليها بش تخدم عليها, هاكا علاه اساتذتنا في الطب النووي يشجعونا بش نعملوا تربصات في الخارج بش نتعلموا. اما اليوم، البيروقراطية بوزارة الصحة قررت بش تحرمني من اني نعمل تربص لمدة عام في الخارج !
التربص الي بش نضيعوا في قسم الطب النووي بمستشفى Bichat بباريس، المصنف الاول في فرنسا في المستشفيات ذات اكثر من 600 فراش، بجامعة Paris-Diderot المصنفة 3 في فرنسا و ال84 عالميا(CWUR)...
القسم هذا فيه : - الة PETScan ( الي موجودة منها وحدة برك في الجمهورية التونسية كلها، و كان في القطاع الخاص كهو) - ثلاثة GammaCamera (الي يمثلوا نصف عدد الالات الي تخدم في سبيطاراتنا في الجمهورية كاملة) و القسم هذا تابعه وحدة بحث علمي فيها : MicroPETScan يستعموها للبحث العلمي على الحيوانات...IRM 7 tesla،و بش يركبوا SPECT/IRM، الخ...
التربص هذا بش يمكنني نشارك في تكوين بال Centre de recherche du Commissariat à l'Énergie atomique et aux Énergies alternatives بSaclay. و بش نتحصل بعده على Diplome de formation medicale spécialisée و مانيش بش نتكلف حتى مليم زائد على الدولة التونسية (ما ناخوش Bourse) خاطر فرنسا بش تخلصني قد شهرية استاذ في الطب بتونس. رئيسة هذا القسم الي وافقتلي على التربص لمدة عام بعد ما راسلتها، هي الان رئيسة السلطة العليا للصحة بفرنسا (HAS : Haute autorité de Santé), و الرئيس المعوض هو المسؤول الوطني على طب القلب النووي (cardiologie Nucleaire)...
يعني بش يكون تكوين ذات مستوى عالي. و استاذي رئيس القسم الي نخدم فيه حاليا، و اساتذتي في الطب النووي المنتخبين بهيئة الاختصاص، و مسؤولي كلية الطب بسوسة... الكل موافقين على هذا التربص نظرا لقيمته العلمية و للتقنيات الي بش نتعلمها منه و الي بش نجرب نعلمها لزملائي كيف نرجع نكمل بقية تربصاتي في تونس. كيف تسمع هذا الكل، تقول مالا وين المشكل؟!
المشكل انه تم رفض الامضاء على الموافقة على هذا التربص خاطر فما "تعليمات" ! تعليمات في شكل قرار انه ما ينجم يمشي حتى مقيم للتربص بالخارج كان في السنة الاخيرة...
و اني في السنة القبل الاخيرة... (علما و انه ما فما حتى فرق بين السنتين هاذم ! لا فما دروس خاصة بكل سنة، لا امتاحانات، لا شيء) يعني مسؤولين بالوزارة خذاو القرار هذا من 2016، و من وقتها و هوما يحرموا في الناس بش تتعلم و ترجع تكمل تربصها مبعد في بلادها...
"ما نخرجوك كان في العام الاخر... و ما نخرجوا كان شطركم" علما انه زملائي قبلي ولا اساتذتي كانوا يعملوا تربصات لمدة عام او عامين جملة قبل... في سنة الاخيرة او القبل الاخيرة... مالا على شنوة يستند هذا القرار؟ فما مانع قانوني؟ لا ! فما مانع علمي؟ لا : علما و اني خدمت في شطر اقسام الطب النووي الموجودة بالجمهورية ( 2 بين 4)، و قمت حتى بتربص اختياري في الRadiologie...
علما و اني كملت جميع الدروس النظرية في اختصاصي (tous mes EPU ont été validés)، و السنوات القادمة ماعادش عندي دروس بش نحضر عليهم. علما و اني زدت السنة نجحت في امتحانات شهادات الدراسات التكميلية CEC في اختصاصين : Radioprotection و Imagerie Oncologique علما و اني تحصلت على شهادة الدكتوراه في الطب عندي اكثر من عام و خاصة اني التزمت اني نرجع نكمل باقي تربصاتي في السنة القادمة في تونس... يعني ما فماش سبب منطقي ولا علمي ولا قانوني... اما فما "التعليمات" و "بيروقراطية"... و الدولة الفرنسية في نفس الوقت وافقتلي على التربص و سهلتلي فيزا العمل لمدة عام و لقاتلي مقر سكن و كل شيء يعاونوك عليه و مصححينلك فيه، اما بلادك تجيك قبل ب3 اسابيع من بداية التربص تقلك "لا"...
و الأدهى الي يجيوا المسؤولين يعملوا اجتماعات في الوزارة يتصوروا فيهم في التلفزة و هوما مكستمين و يحكيوا على "استراتيجيات" لتشجيع البحث العلمي و تحسين تكوين الشباب و بقاء الاطباء الشبان في تونس... و يعملوا فلخر حاجات نتيجتها العكس !
هوني نسأل حاجة : المسؤولين في البلاد هذه ياخي يفكروا مرات كيف ياخذوا قرارات؟ كيف يحرموا طبة من انهم يتعلموا البرة لمدة عام و يستفيدوا و يرجعوا يفيدوا بلادهم... شنوة الربح متاعهم؟ ماهمش فاهمين الي كيف يحبسوهم و يكرهوهم في خدمتهم في بلادهم و يمنعهم حتى من تربص، راهم الطبة هاذم بش يويليو يفكروا يكملوا "الربطية" و بعدها يهربوا على طول؟ ما يعرفوش الي كانك تحب تخلي الطبة متاعك في بلادك لازم تحسسهم انهم قاعدين بمحض ارادتهم، موش تربطهم و تقصلهم جوانحهم بالسيف؟
و كيف يجيبوا الات تسوى بالمليارات للسبيطارات اما ما يفكروش في تكوين الناس الي بش تخدم عليها، على شنوة ناويين؟ المسؤولين في البلاد هذه قاعدين يهدموا في الي تبنى الكل... و ماهم بش يفيقوا باغلاطهم كان ما يلقوا رواحهم في سبيطارات فارغة من الطبة و الفراملة و الدواء ... اما مانيش بش نسكت! و بش نحاول بالطرق الكل بش ما نضيعش هذه الفرصة... مانيش بش نرضى بالرداءة و العوج! #سيبني_نتعلم".
